Хуан Карлос Флоријан е именуван за нов министер за еднаквост на Колумбија. Со познавање од областа на човековите права и искуство во меѓународни организации, тој привлече внимание откривајќи дека бил поранешен сексуален работник и порно актер.
Флоријан, политиколог по професија и заменик-министер во истото министерство од април, има речиси 20 години искуство во организации како што се „Лекари без граници“ и „Спасете ги децата“, пишува Klix.ba.
Сепак, во последните денови она што привлече најголемо внимание не беше неговата обемна професионална кариера, туку фактот дека бил поранешен порно актер. Во објава на Инстаграм, Флоријан рече дека не доаѓа „од елитата“.
„Јас доаѓам од улицата, од борбата, од вистинскиот активизам. Бев сексуален работник, создавав содржини за возрасни, сум ХИВ позитивен и бев мигрант“, рече тој. „Но, јас сум и политиколог, бев креатор на јавни политики, јавен менаџер, бранител на човековите права, заменик-министер и, пред сè, син на народот кој не заборави од каде доаѓа.“
Контроверзното назначување беше објавено од кабинетот на претседателот оваа недела. Во текот на првите месеци од прогресивната влада, која започна со работа во август 2022 година, беше основано Министерството за еднаквост. Колумбискиот претседател Густаво Петро ја бранеше својата одлука да го назначи Флоријан за министер за еднаквост, истакнувајќи ја неговата кариера.
„Тој го водеше ЛГБТИ одделот на Богота Хумана и поради тоа добиваше закани со смрт. Отиде во егзил во Париз, каде што мораше да користи веб-камера за да преживее. Подоцна повторно се поврза со земјата, а јас сакав тој да ја преземе функцијата заменик-министер“, рече Петро кон средината на јули.
View this post on Instagram
