Пратеникот во Собранието на Македонија, Беким Ќоку, изјави дека нему, на уште еден пратеник и на заменик-генералниот секретар на Владата им бил оневозможен влез во Албанија, без, како што тврди, да добијат официјално објаснување од надлежните власти.
Според неговите наводи, тројцата функционери, кои се етнички Албанци од Македонија, биле задржани повеќе од еден час на граничниот премин Ќафасан при обидот да влезат во Албанија.
„Тројца албански државни функционери од Македонија, двајца пратеници и заменик-генералниот секретар на Владата, се соочивме со необјаснива ситуација на влез во Република Албанија. Едно рутинско преминување на границата се претвори во апсурдна драма. Во кабината каде што ги предадовме пасошите, македонскиот полицаец ни кажа дека, според потврдата од неговиот албански колега, забраната за влез важела и за нас тројцата. Зошто претходно ни дозволија да поминеме, останува енигма“, наведува Ќоку.
Пратеникот посочи дека доколку причината за забраната е неговата јавна поддршка за неодамнешните протести во Албанија против премиерот Еди Рама, тоа би било сериозен сигнал за загриженост.
„Ако причината е тоа што јавно ги поддржав последните протести во Албанија, тогаш тоа би било длабоко загрижувачко. Казнувањето на граѓаните поради изразување став или поради мирна поддршка на протести не е во согласност со стандардите на една демократска држава и со основните слободи“, наведува пратеникот.
