Финансиските друштва веќе нема да исплаќаат пари во готово, а ќе се воведат и задолжителни внатрешни тела во секое финансиско друштво, како одбор за внатрешна ревизија, одбор за кредитен ризик, надзорен одбор… Ова се предвидува со измени и со дополнувања на Законот за финансиски друштва, со кои значително ќе се заострат условите за работа на компаниите што одобруваат брзи кредити. Новите законски решенија, освен поголем надзор и повисоки стандарди за работење, предвидуваат и дополнителни механизми за заштита на граѓаните, откако контролите покажале низа слабости и неправилности во работењето на дел од финансиските друштва.
Дополнително, отворањето нови деловни простории ќе биде можно само со претходна согласност од Министерството за финансии и исполнување на прецизно утврдени критериуми. Измените предвидуваат и зголемување на основната главнина на финансиските друштва, како и целосно укинување на готовинските исплати на кредити. Во иднина, кредитните средства ќе можат да се исплаќаат исклучиво преку банкарска сметка, со што ќе се овозможи поголем увид на финансиските трансакции и ќе се намали можноста за злоупотреби.
Министерката за финансии, Гордана Димитриеска-Кочоска, изјави дека законските измени се подготвуваат по спроведените контроли со кои биле утврдени слабости и непрецизности во постојната регулатива.
– По спроведените контроли, утврдивме одредени слабости и непрецизности во постојната регулатива, кои оставаат простор за различни толкувања и практики. Затоа пристапуваме кон заострување на критериумите и воведување поголем надзор, вклучително и задолжителни внатрешни одбори и ограничување на готовинските исплати. Целта е поголема заштита на граѓаните и стабилно функционирање на секторот, изјави министерката.
Според неа, досегашните контроли резултирале со констатирани неправилности, а во одредени случаи биле преземени и најстроги мерки, меѓу кои и одземање лиценци за работа. Дел од постапките биле иницирани и по претставки од граѓани.
Покрај заострувањето на условите за работа, финансиските друштва ќе мора да се откажат и од агресивните маркетиншки кампањи кои создаваат впечаток дека кредитите се едноставна и безризична финансиска услуга. Министерството веќе најави ограничувања за рекламни пораки како „пари веднаш“, „кеш за минута“ или „продавница за пари“, оценувајќи дека тие можат да ги доведат потрошувачите во заблуда и да поттикнат импулсивно задолжување.
Ова следува по надзорите во кои инспекторите откриле случаи на рекламирање кредити со нулта каматна стапка, додека во договорите со клиентите биле вклучени дополнителни трошоци и надоместоци кои не биле јасно истакнати во рекламите.
Со новите законски измени, Министерството за финансии очекува значително зајакнување на надзорот врз финансиските друштва, поголема транспарентност во нивното работење и повисоко ниво на заштита на граѓаните кои користат брзи кредити.
