„Во бизнис мрежата на Мицкоски во енергетиката влегува уште една алка, уште една институција, Регулаторната комисија за енергетика. Мицкоски го избира Ацо Ристов на чело на Регулаторната комисија за енергетика. Тело кое ги носи сите одлуките за цените на струјата, на горивата, на енергенсите. Кој е Ацо Ристов? Поранешен градоначалник на ВМРО во Радовиш. Сопруг на судијката Данка Ристова која претходно беше избрана за членка на Судскиот совет. И најважното, бизнисмен во енергетиката, со хидроцентрали, исто како Мицкоски“ рече денеска на прес-конференција Јон Фрчкоски – член на Извршниот одбор на СДСМ.
Фрчкоски вели „како сопственик на бизнис кој произведува струја и добива тарифи од државата, Ристов сега треба да носи одлуки во РКЕ кои ги диктираат токму тие цени и правила на пазарот. Не е ова само конфликт на интереси, ова е бизнис операција која однапред била осмислена да се вклопи во бизнис мрежата на Мицкоски. Ристов во изминатиот период се „ослободува“ од сопственоста во компаниите поврзани со изградба на мали хидроцентрали. Компанијата што носи стотици илјади евра годишна добивка, одеднаш менува сопственик. И ја презема сметководителка од Радовиш, тотално непозната за секторот“.
„Дали е ова случајно? Или е класичен пример на „чистење“ пред преземање на функцијата во РКЕ? Ништо не е случајно, ова е внимателно плетена бизнис мрежа. Очигледно се знаело однапред. Уште една алка во синџирот што СДСМ веќе го разоткри: Почнувајќи од Адамовиќ, функционер на СНС, преку офшор структурите на Кипар и компаниите поврзани со енергетскиот бизнис, поврзаноста со „Руднап“, РЕК Битола, Развојната банка, Божиновска“ вели Фрчкоски.
Тој вели „сите делчиња од својата мрежа Мицкоски ги намести. Има свои луѓе од почеток до крај – од производство и увоз на струја, до продажба и банкарство. Кој тоа ќе го плати? Народот. Кога граѓаните ќе видат денеска високи цени на горивата, нека се сетат на бизнис мрежата на Мицкоски, кој ги предлага, а кој ги одобрува високите цени. Кога ќе видат висока сметка за струја – тоа е позадината“.
