Коњаницата „Бигорски Манастир – Патот на Црешовото Топче“ денес го продолжи коњичкиот марш од Зубовце, Тумчевиште и Гостивар по патеките на македонскиот непокор.
Во свечена, достоинствена и национално набиена атмосфера, коњаницата денес го продолжи коњичкиот марш во рамките на традиционалната манифестација „Патот на Црешовото Топче“, со што се означи почетокот на шеснаесеттото по ред патување во чест на илинденските херои.
Овој марш, кој низ годините прерасна во симбол на духовното и револуционерно будење на македонскиот народ, оваа година тргна од Зубовце, Тумчевиште и Гостивар — места чии срца чукаат во ритамот на македонскиот непокор.
Од утринските часови, низ улиците на Зубовце се слушна ечењето на коњските копита и се развиорија знамиња со сонцето од Кутлеш. Жителите ги испратија коњаниците што ја продолжуваат славната традиција на нашите предци.
Истото чувство на национална гордост го исполни и Тумчевиште, каде жителите ја прославуваат селската слава „Свети Архангел Гаврил“.
Особено значаен духовен белег на денешниот ден беше светата литургија што се одржа во црквата „Св. Богородица“ во центарот на Гостивар.
Архиерејската литургија ја предводеше Владиката Јосиф, архиереј на Тетовско-Гостиварската Епархија, заедно со свештеници од епаријата.
По завршувањето на богослужбата, Владиката Јосиф им посака среќен пат до Крушево, повикувајќи ги да ја понесат молитвата, љубовта и благословот на целиот народ во нивното патување исполнето со чест, одговорност и духовна сила.
Коњаниците со гордост истакнаа дека годинашниот марш го посветуваат на македонските уставобранители – неправедно осудени, но достоинствени луѓе, кои останаа верни на правдата, на уставот и на својот народ.
