Адвокатот Јанаки Митровски на социјалните мрежи остро реагираше по кривичната пријава против шест лица од Битола, кои креирале лажен профил на 14-годишно девојче и преку него договарале средби со мажи, по што ги снимале и објавувале на социјалните мрежи.
„Битолската полиција уапсила шест златни деца од Битола кои, види бога ти, ја работеле нивната работа. Креирале лажен профил на 14-годишно девојче и ловеле педофили“, напиша Митровски.
Тој ги оспорува делата што им се ставаат на товар, меѓу кои насилство, злоупотреба на лични податоци, неовластено снимање и самовластие, поставувајќи прашања дали воопшто постојат елементи за такви обвиненија.
Според адвокатот, наместо кривични пријави, младите требало да бидат пофалени за своите постапки.
„Наместо пријава, битолската полиција треба да ги части децава. Не чувме само за кој педофил пуштија пријава. Ја’к! Слобода за децата!“, порача Митровски.
Претходно, СВР Битола соопшти дека против пет полнолетни лица и еден малолетник е поднесена кривична пријава поради сомнение за сторени кривични дела „насилство“, „злоупотреба на лични податоци“, „неовластено снимање“ и „самовластие“.
