Аеродромот во Минхен утрово ја возобнови работата, откако сите полетувања и слетувања беа стопирани во текот на изминатата ноќ поради регистрирани беспилотни летала, пренесе ДПА.
Сепак, патниците се известени дека се очекуваат задоцнувања и евентуални повторни прекини во текот на денот.
Авиосообраќајот на вториот најголем аеродром во Германија беше суспендиран втора последователна ноќ во петокот вечерта, како мерка на претпазливост откако беа видени две беспилотни летала.
Голем број летови беа пренасочени или поништени, а приближно 6,500 патници останаа блокирани на аеродромските терминали.
Некои од нив мораа да ја поминат ноќта на аеродромот, каде што им беа доставени кревети за кампување, ќебиња, освежителни пијалоци и грицки.
