Сведочењата на денешното рочиште за пожарот во дискотеката „Пулс“ даваат многу потресна и детална слика за тоа како се одвивале настаните кобната ноќ. Според сведоците, пожарот избувнал во моментите кога во објектот имало голем број посетители. Огнот се проширил исклучително брзо, за само неколку десетици секунди зафаќајќи го таванот, што предизвикало паника и целосен хаос меѓу присутните.
Сведокот Мартин Димитров раскажа дека огнот започнал околу 2:30 часот по полноќ.
„Ја фатив девојка ми и ја истуркав заедно со другарка ѝ. На масата остана една девојка, не сакаше да излезе, и јас и нејзиниот дечко ја фативме за раката. Се истуркавме до излезот, каде што се заглавивме малку, и ако подзадоцневме 8-12 секунди, немаше да излеземе. Надвор беше хаос и имаше многу луѓе. Додека бев на првата скала, се свртев назад и сѐ беше темно, почнаа да пукаат светилките“, рече Димитров.
Луѓето почнале да се туркаат кон единствениот излез, при што настанала опасна гужва. Некои од сведоците опишуваат дека успеале да се спасат во последен момент, буквално за неколку секунди, додека други останале заглавени во внатрешноста. Дел од присутните биле извлекувани со помош на други лица, а во некои случаи спасувањето се одвивало и преку импровизирани отвори во ѕидовите. Имало и случаи на губење на свест поради чад и метеж.
Посебно загрижува тоа што, според изјавите, во објектот речиси и да немало противпожарна опрема, ниту пак јасно организирана евакуација. Сведоците исто така потврдуваат дека во дискотеката имало и малолетници, што отвора дополнителни прашања за почитување на законските прописи. Повеќемина го поврзуваат избувнувањето на пожарот со употреба на пиротехнички средства за време на настапот.
