Меѓу најголемите губитници вчера беше акцијата на Тесла, со пад на цената од речиси 7 отсто, откако извршниот директор на компанијата, Елон Маск, објави лансирање на нова политичка партија, што, според стравувањата на инвеститорите, може да доведе до понатамошно ескалирање на конфликтот меѓу него и Трамп.
Акциите на Волстрит од вчера нагло почнаа да паѓаат, откако американскиот претседател Доналд Трамп објави зголемување на царините за увоз од 14 земји, вклучувајќи ги Јапонија и Јужна Кореја, мерка што треба да стапи на сила од 1 август.
Индустрискиот индекс на Доу Џонс падна за 0,94 отсто на 44 406 поени, додека индексот С&П 500 падна за 0,79 отсто на 6 229 поени, а индексот на берзата „Насдак“ падна за 0,91 отсто на 20 412 поени.
Викендов Трамп се закани со специјални тарифи од 10 отсто за сите земји што се согласуваат со „антиамериканските политики“ на групата БРИКС, која ги вклучува Бразил, Русија, Индија, Кина и Јужна Африка, а вчера испрати писма за повисоки тарифи за увоз од 14 земји.
Така, од 1 август, ќе се воведат царински давачки од 25 проценти за увоз од Јужна Кореја, Јапонија, Тунис, Малезија и Казахстан, 30 проценти за стоки од Јужна Африка и Босна и Херцеговина, 32 проценти за увоз од Индонезија, 35 проценти за стоки од Србија и Бангладеш, 36 проценти за Камбоџа и Тајланд и 40 проценти за Лаос и Мјанмар.
Во писмата на Трамп се наведува дека сите царини наметнати од други земји ќе бидат додадени на веќе постоечката американска царина од 25 проценти.
„Ако од која било причина одлучите да ги зголемите вашите царини, тогаш без разлика колку ќе одлучите да ги зголемите, тие ќе бидат додадени на 25-те проценти што ги наплаќаме“, рече Трамп во писмата до Јапонија и Јужна Кореја.
Досега, Белата куќа постигна трговски договор само со Виетнам, како и рамковни договори со Кина и Велика Британија.
Тесла е меѓу најголемите губитници
Меѓу најголемите губитници вчера беше акцијата на Тесла, со пад на цената од речиси 7 отсто, откако извршниот директор на компанијата, Елон Маск, објави лансирање на нова политичка партија, што, според стравувањата на инвеститорите, може да доведе до понатамошно ескалирање на конфликтот меѓу него и Трамп.
На повеќето европски берзи, од вчера цените на акциите пораснаа. Лондонскиот индекс ФТСЕ ослабе за 0,19 отсто, на 8 806 поени, но франкфуртскиот ДАКС порасна за 1,20 отсто, на 24 073 поени, а парискиот САС за 0,35 отсто, на 7 723 поени.
