Американскиот претседател Доналд Трамп и рускиот претседател Владимир Путин ја завршија средбата во Алјаска без да постигнат договор за прекин на војната во Украина.
Средбата траеше три часа, а покрај Трамп и Путин, учествуваа и специјалниот претставник на САД за Блискиот Исток, Стив Виткоф, и државниот секретар Марко Рубио. И покрај помпезните најави, Трамп и Путин не успеаја да постигнат договор за прекин на војната во Украина и не одговорија на прашања од медиумите по средбата. Сепак, за време на нивното обраќање по средбата, тие изјавија дека имало „значаен напредок“, иако не дадоа детали за тоа што точно значи тоа.
Единствените информации за средбата ги даде Трамп во интервју за Фокс њуз, каде што откри дека се согласил за некои работи со Путин. Меѓу другото, двајцата лидери се согласија за идејата за размена на територии и за идна средба на која ќе учествува и украинскиот претседател Володимир Зеленски.
Исто така, за време на интервјуто за Фокс њуз, Трамп нагласи дека сега е до Зеленски да „склучи договор“ и дека сите договори мора да бидат прифатени од Украина. Да потсетиме дека Зеленски претходно изјави дека нема да има размена на територија, односно предавање на украинските области што се под окупација на Русија.
Вреди да се истакне и интересната реакција на Путин за време на обраќањето по средбата. На забелешката на Трамп дека „наскоро ќе се видат повторно“, Путин рече дека „следниот пат ќе биде во Москва“.
