Агенцијата за национална безбедност соопшти дека лицата поврзани со обидот за опожарување на објектот на Еврејската заедница и синагогата во Скопје биле дел од радикална групација идеолошки надоврзана на глобалната мрежа на Исламска држава. Случајот, кој се случи на 12 април, сега се третира како антитерористичка операција во која се приведени седум лица, а против дел од нив е поведена постапка за тероризам.
АНБ информира дека, согласно своите надлежности, презела оперативно-технички и аналитички мерки за да ги идентификува мотивите и непосредните извршители на нападот врз верскиот објект. Според Агенцијата, биле идентификувани лица кои се најверојатни извршители, нивната логистичка мрежа и повеќе објекти во Скопје поврзани со случајот.
Во соопштението на АНБ се наведува дека лицата, како дел од радикална групација идеолошки поврзана со Исламска држава, презеле насилни активности непосредно по повик на оваа терористичка организација од почетокот на април. Акцијата за лишување од слобода и претреси била спроведена на 30 април, во соработка со Обвинителството за гонење организиран криминал и корупција и Министерството за внатрешни работи.
Министерството за внатрешни работи претходно соопшти дека случајот со обидот за опожарување на верскиот објект на Еврејската заедница во Скопје е расчистен по повеќе оперативно-тактички мерки преземени од Секторот за борба против тероризам, насилен екстремизам и радикализам, во координација со СВР Скопје и АНБ.
Во рамки на акцијата, извршени се претреси на 13 локации на територијата на Скопје. Приведени се седум лица, а одземени се предмети и електронски уреди поврзани со кривичното дело. По наредба на јавен обвинител, лицата биле задржани за понатамошна постапка.
Според објавените информации од МВР, кривична пријава е поднесена против А.Љ., 21-годишен жител на Скопје, поради основи на сомневање за кривично дело „тероризам“ по член 394-б од Кривичниот законик. Кривична пријава е поднесена и против А.Р., 38-годишен жител на Скопје, за истото дело во врска со помагање. На двајцата им е одредена мерка притвор од судија на претходна постапка.
Обидот за опожарување беше пријавен на 12 април, кога во дворот на верскиот објект на улицата „Апостол Гусларот“ биле забележани канистер за гориво и траги од горење. МВР тогаш информираше дека полициски службеници излегле на местото на настанот и дека се преземаат мерки за расчистување на случајот.
Еврејската заедница во Македонија веднаш го осуди нападот и побара целосно расветлување на случајот и доследна примена на законите. Од заедницата оценија дека нападот не е само напад врз верски објект, туку удар врз соживотот, достоинството и заемната почит, предупредувајќи и на растечки говор на омраза и нетолеранција.
Во јавноста претходно беше објавена и видеоснимка од нападот. На снимката се гледаат две лица кои ја прескокнуваат оградата, се доближуваат до влезот на објектот, прскаат запалива течност и фрлаат запален предмет, по што избувнува пожар. Израелската амбасадорка Вивијан Ајзен тогаш го оцени инцидентот како длабоко вознемирувачки антисемитски напад и повика одговорните да бидат изведени пред правдата.
