Во Скопје, во општините Тетово и Куманово, како и вдолж коридорите „8“ и „10“ од 1 јануари 2026 ќе биде спроведен проектот „Безбеден град, безбедна држава“. Се очекува до средината на 2026 година со камери на крстосниците да биде покриена целата територија на Република Македонија. Ова го соопшти вчера министерот за внатрешни работи Панче Тошковски во Охрид на средбата со неговиот словенечки колега Боштјан Поклукар.
Тошковски информираше дека измените во законот за безбедност во сообраќајот и патиштата, во кои се вградени одредбите за „Безбеден град“ во Собранието на Република Македонија го поминаа првото читање пред матичната комисија. Тошковски порача дека со овој закон не се предвидува казнување на граѓаните, заради полнење на државниот буџет, туку оти е целта да се спасат човечки животи.
„Целта на овој систем не е да бидат казнувани македонските граѓани.Целта на овој систем не е да се полни буџетот на Република Македонија, туку да се спаси барем еден човечки живот. Бројките се страшни. Во 2024 година има 142 жртви како последица на непочитување на сообраќајни правила и сообраќајни несреќи, кои кои се случиле. Сигурен сум дека бројките ќе се намалуваат со ставање на системот во функција.“ – нагласи првиот човек на Министерството за внатрешни работи.
Тој порача дека контролите ќе продолжат и оти ќе ги заострат казните особено во Кривичниот законик: освен парична казна ќе се изрекува и казна затвор и трајно одземање на возилата, со кои се сторени кривичните дела.
