Лидерите на земјите од БРИКС се согласија да започнат пилот-програма за воведување на заеднички гарантен механизам, со цел зголемување на стратешките инвестиции во членките и поширокиот Глобален Југ, според финалната Декларација од самитот одржан во Рио де Жанеиро.
Според документот, иницијативата ќе биде развиена во 2025 година во рамките на Новата банка за развој (НБР) и ќе се базира на постојното меѓународно искуство, а акционерите нема да уплатат дополнителен капитал, пренесува РИА Новости. Резултатите ќе бидат презентирани на следниот самит на БРИКС во 2026 година. „Целта на оваа иницијатива е да се понудат индивидуални гарантни инструменти за намалување на ризиците и зголемување на кредитниот рејтинг на клучните инвестиции во земјите на БРИКС и Глобалниот југ“, се наведува во Декларацијата.
Фокусот на Механизмот за меѓубанкарска соработка на БРИКС на промовирање на иновативни финансиски практики, вклучително и поддршка на финансирањето на проекти во националните валути на земјите-членки, беше исто така поздравен. Лидерите на БРИКС дополнително ги задолжија министрите за финансии и гувернерите на централните банки да продолжат да работат на разгледување на можноста за воспоставување сопствена инфраструктура за прекугранични плаќања, вклучително и иницијативата БРИКС „Клир“ – независна прекугранична инфраструктура за порамнување и депозити. Оваа идеја за прв пат беше официјално спомената за време на претходниот самит во Казан, како одговор на зголемените барања за поголем финансиски суверенитет и намалена зависност од западниот финансиски систем.
