Фудбалерите на Вардар го освоија Купот на Македонија за сезоната 2024/25. Црвено-црните во финалето славеа со 2:0 над Струга ТЛ. Вардар го освои шестиот Куп во клупската историја, прв по пауза од 18 години.
Вардар до триумфот го предводеше младиот напаѓач Талевски. Ги постигна двата гола во 26. и 48.минута од натпреварот.
Струга имаше свои шанси во ова финале, но не искористи ниту една. Најдобрите не ги искористија Укпа, Радески и Кривањева кога резултатот беше 0:0. Откако Талевски го постигна првиот гол, Доминго ја погоди стативата.
Тренерот на Вардар, Гоце Седлоски го освои првиот трофеј во Купот, додека неговиот колега Илчо Ѓорѓиоски не успеа да дојде до трофејот во Купот и во своето второ финале.
Вардар со оваа победа избори пласман во квалификациите во Конференциската лига.
По мечот стратегот Гоце Седловски беше презадоволен.
„Сакам да им честитам на играчите на Вардар и на Струга. Сосема заслужено победивме, она кое го барав од сите, беше исполнето на теренот. Оваа екипа заслужува повеќе, знаете колку победи имаме оваа полусезона. Вакви фраери, им честитам. Знаете сами каде беше Вардар пред шест месеци, а каде е сега. Купот е заслужен. Верувам дека оваа екипа ќе се надградува и со неколку засилувања ќе дојдеме поинаку“, изјави Седлоски.
