Секторот за контрола и истраги преку Одделението за оперативни работи спречи обид за нелегален пренос на готовина во износ од половина милион евра пронајдени во специјално контруиран бункер на минибус, што резултираше со историски најголема заплена на девизи, потенцира директорот на Царинска управа, Бобан Николовски на прес-конференција на која информираше за случајот.
Девизите и возилото се трајно одземени, а сторителот, државјанин на Република Албанија со иницијали Џ.Г. кој управувал со минубусот е соодветно гонет, за што веќе е изречена и судска пресуда од основниот суд Куманово.
Обидот е откриен во акција на Одделението за оперативни работи на влез во државата на граничниот премин Табановце во која била извршена детална контрола на минибус, сопственост на туристичка агенција од Албанија, со кој биле превезувани седум патници.
„Акцијата во која учестуваа мобилен тим, K9 единицата и Службата за мобилни скенери е извршена брзо и ефикасно. Мобилниот тим кој поседува огромно искуство веднаш забележа преправки на возилото, по што е пуштено царинско куче кое укажа на индиции за криумчарење на истото место. Сомнежите се потврдија и со скенирање на возилото од Службата за мобилни скенери, по што инспекторите од мобилниот тим пристапија кон отстранување на профилот во кој пронајдоа вкупно 14 проѕирни ќеси во кои беа спакувани 500 илјади евра“, рече директорот и порача дека секој обид за нелегален прекуграничен пренос на готовина ќе биде најстрого санкциониран.
Николовски упати и јавна благодарност до тимовите од Одделението за оперативни работи за брзата реакција и школски одработената професионална контрола.
Согласно закон, запленетите девизи се предадени на Агенцијата за одземен имот, од каде се депонирани во Народната банка.
