Мрежата за заштита од дискриминација упати остар апел до Собранието на Република Македонија да не ја именува кандидатката Џихан Ахмед за член на Комисијата за спречување и заштита од дискриминација (КСЗД).
Според Мрежата, номинацијата е „несериозна и понижувачка“ бидејќи кандидатката не ги исполнува законските услови и покажала загрижувачко ниво на некомпетентност за време на јавната расправа.
На јавната расправа одржана на 20.01.2026 година, кандидатката Ахмед, иако е магистер по меѓународно право, не успеала да покаже основно познавање на Истанбулската конвенција – клучниот стратешки документ за заштита на жените од насилство. На прашањето за темелите на оваа конвенција, таа дала одговор во историски контекст, зборувајќи за градот Истанбул и периодот на Ататурк, наместо за правните механизми за заштита од дискриминација.
Законот предвидува дека член на Комисијата мора да има минимум седум години работно искуство во областа на човековите права, од кои пет години конкретно во областа на еднаквост и недискриминација. Ревизијата на јавно достапното CV на Ахмед покажува дека таа нема ниту еден ден работно искуство во оваа сфера. Нејзиното претходно искуство е во приватни фирми, како асистент на универзитет и професор во средно училиште, со фокус на корпоративната безбедност, што не е соодветно за оваа функција.
Мрежата потсетува дека Собранието има клучна улога во Поглавјето 23 (правосудство и фундаментални права) и дека напредокот на државата зависи од изборот на компетентни лица кои ќе ги штитат најранливите категории граѓани. Изборот на лица кои не ги познаваат ниту основните поими за дискриминација претставува сериозен чекор наназад во евроинтеграциските процеси.
