Британката Етел Кејтерем, за која се верува дека е најстарата личност на светот, денеска наполни 116 години.
Таа ќе го помине својот роденден „мирно“ со најблиските, за да може да ужива во овој ден „со свое темпо“, соопшти нејзиното семејство.
Кејтерем, која живее во дом за стари лица во Сари, како најстарата личност во Велика Британија, со 115 години, во мај стана најстарата личност на светот, по смртта на бразилската калуѓерка Ина Канабаро Лукас која го држеше тој рекорд, објави „Скај њуз“.
Родена во Хемпшир на 21 август 1909 година, таа е најмладата личност што е крунисана за најстара жена на светот од 2013 година.
Таа е исто така меѓу најстарите преживеани од коронавирусот, бидејќи била заразена на 110-годишна возраст во 2020 година.
Кејтерем го надживеа својот сопруг Норман, кој почина во 1976 година, како и своите деца, Џем и Ен, кои починале во раните 2000-ти, односно 2020 година.
Одбивајќи да дава изјави за медиумите, таа рекла дека секоја порака или контакт од кралот Чарлс ќе биде „нејзина единствена отстапка“, наведува „Скај њуз“.
На својот 115-ти роденден, таа добила писмо од кралот Чарлс Трети, во кое тој напишал дека е „охрабрен од фасцинантната лична приказна на Етел“.
Етел, која е втора најмлада од осум деца, е родена три години пред трагедијата на бродот „Титаник“ и осум години пред Руската револуција, пишува „Дејли мејл“.
Една од нејзините сестри, Гледис Бабилас, исто така наполни 100 години, родена е во 1897 година и доживеела 104 години.
Во соопштението објавено од нејзиниот дом за стари лица се вели: „Етел и нејзиното семејство се многу благодарни за сите љубезни пораки и интерес што ѝ ги покажаа додека таа го слави својот 116-ти роденден оваа година.
„Етел ќе го помине денот мирно со своето семејство за да може да ужива во него со своето темпо. Ви благодарам уште еднаш за вашите љубезни желби на овој посебен ден.“
Најстарата личност што некогаш живеела, колку што е познато, била Французинката Жан Луиз Калман, која починала во 1997 година на возраст од 122 години и 164 дена.
