По неодамнешниот успешен тест на „Буревестник“, крстосувачка ракета на нуклеарен погон со неограничен дострел, Русија сега успешно тестира уште едно нуклеарно оружје. Станува збор за нуклеарниот подводен дрон „Посејдон 2M39“.
Веста за успешниот тест во вторникот ја објави рускиот претседател Владимир Путин, јавуваат руските и странските медиуми. Путин извести за тестирањето на „Посејдон“ за време на посетата на воената болница во Москва.
„Вчера (вторник) спроведовме уште еден тест, на уште еден ветувачки систем – подводниот дрон ‘Посејдон’. Нема начин да се пресретне“,рече Путин.
Според руските власти, ова оружје е на нуклеарен погон и може да носи нуклеарни боеви глави.
„Посејдон“ е подводен дрон на нуклеарен погон, способен да носи атомска боева глава од два мегатони. Оваа боева глава може да се детонира повеќе од илјада метри под површината на морето, со цел да се создаде цунами кое би ги контаминирало сите околни крајбрежни области со радиоактивни честички, правејќи ги непогодни за живеење. Се вели дека „Посејдон“ патува со брзина од 200 километри под површината на морето и може да нурне до длабочина до еден километар.
Покрај тоа, „Посејдон“ може да изведува тридимензионални вртења во водата, што дополнително помага во избегнување какви било обиди за негово пресретнување.
Со оглед на неговата способност да уништи големи области на крајбрежните области, „Посејдон“ претставува јасна стратешка закана за американската инфраструктура.
Слично на тоа, воените експерти претходно го нарекоа „оружје на судниот ден“ поради неговата потенцијална деструктивна моќ.
