Добрите вести конечно пристигнаа за младиот гитарист од Штип, Горан Тонев, кој беше дел од бендот на ДНК. По двомесечно лекување во болница во Солун, тој се врати дома. Веднаш по трагедијата, поради сериозноста на повредите, беше испратен на лекување во Грција.
На својот профил на Фејсбук, Тонев објави фотографија на која е со завои на главата, вратот и рацете — доказ за сериозноста на повредите здобиени при пожарот во дискотеката.
На фотографијата е заедно со медицинскиот персонал кој се грижел за него за време на неговиот престој во болницата.
„Му благодарам на Бога што ми даде втора шанса, и на целиот персонал од болницата ‘Папаниколау’ во Солун за нега и грижа. Исто така, огромна благодарност до медицинските екипи во Кочани и Скопје, како и до моите роднини и пријатели кои се молеа за мене. Чувствата ми се измешани — колку што сум благодарен и среќен што сум жив, толку сум и тажен поради загубата на младите животи, особено на моите колеги и пријатели. Сочувство до сите семејства“, напиша Тонев.
