Германската полиција се обидува да ја потврди автентичноста на писмо во кое се презема одговорност за подметнат пожар што остави околу 50.000 домаќинства во југоисточен Берлин без електрична енергија.
Според полицијата, текстот објавен денеска на левичарската платформа Indymedia наведува дека нападот бил насочен против научниот парк во населбата Адлерсхоф, каде што се наоѓаат бројни технолошки центри, како и неколку оддели на универзитетот Хумболт во Берлин.
Пожарот, кој избувнал ноќеска кога два далноводни столба во квартот Јоханистал се запалиле, оставил десетици илјади домаќинства без струја, соопшти противпожарната служба.
Првичните истраги укажуваат дека пожарот бил предизвикан од подметнување, изјави утрово портпарол на полицијата.
Пожарот е изгаснат, а крим-полицијата е на лице место за да ја истражи причината за пожарот. Според операторот, иако околу 15.000 домаќинства веќе повторно добиле електрична енергија, може да потрае до утре пред сите да бидат повторно приклучени на мрежата.
Полицијата, исто така, истражува можна врска со плановите на американскиот производител на автомобили Тесла да изгради развоен центар во областа, соопшти портпаролка на полицијата.
Сепак, засега нема конкретни индикации за тоа, додаде таа.
Американскиот производител, кој го управува својот најголем европски погон непосредно надвор од Берлин, минатата недела најави дека планира да изгради нов европски развоен центар во берлинскиот округ Кепеник, кој се наоѓа во близина на областа погодена од денешниот прекин на струја.
Тесла, која се соочува со масовни протести поради плановите за проширување на својата фабрика за производство, досега не ја открила точната локација на идниот објект.
Неколку домови за стари лица, училишта, градинки и трамваи исто така биле погодени од прекините на струја. Полицајци управуваат со сообраќајот на некои места, бидејќи повеќе семафори не работат.
