Професорот Тони Дескоски во јавна објава оцени дека првите чекори на јавниот обвинител Савески влеваат надеж за посериозен пристап во справувањето со наталожените проблеми во обвинителството, но предупреди дека пред него стојат неколку клучни и чувствителни предизвици.
Според Дескоски, новиот обвинител треба да се фокусира на три краткорочни приоритети. Како најважен го посочува случајот со трагедијата во Кочани, за кој вели дека претставува „национална траума“ и бара правда. Тој изразува сомнеж во квалитетот на актуелното обвинение, посочувајќи на проблеми со причинско-последичната врска кај дел од обвинетите, како и на можноста да недостасуваат лица кои би можеле да сносат одговорност.
Вториот приоритет се однесува на последиците од работењето на поранешното Специјално јавно обвинителство, предводено од Катица Јанева. Дескоски оценува дека расчистувањето со, како што наведува, „талогот“ од тој период веќе е започнато, при што нагласува дека е потребно системско отстранување на последиците од, како што го нарекува, неуспешниот проект.
Како трет приоритет, професорот го посочува обвинението против Жан Митрев, за кое вели дека, според текот на судењето, се соочува со сериозни предизвици. Тој смета дека обвинителот Савески ќе треба јасно да се изјасни дали стои зад тоа обвинение, предупредувајќи дека во спротивно постои ризик од негов неуспех на суд.
Дескоски оценува дека јавноста има големи очекувања од правосудниот систем и дека актуелното раководство на обвинителството има шанса да одговори на тие очекувања, но само доколку преземе одлучни и јасни чекори.
