Од Центарот за управување со кризи (ЦУК) апелираат на зголемена внимателност особено во Полошкиот регион и Општина Тетово, поради интензивните врнежи од дожд.
Од ЦУК информираат дека обилните дождови предизвикале проблеми со апсорпцијата на атмосферската и фекалната канализација во урбаните делови на Тетово.
Проблемот довел до задржување на вода и создавање големи водени површини под подвозниците и надвозниците.
ЦУК апелира до граѓаните за зголемена внимателност при движење низ улиците и препорачува избегнување на сообраќајот кон наведените делови од патната инфраструктура.
Од Центарот за управување со кризи велат дека надлежните екипи се веќе на терен и активно работат на надминување на состојбата.
Од Управата за хидрометеоролошки работи (УХМР) велат дека денеска ќе има повремени локални врнежи од дожд кои на некои места ќе бидат пообилни со над 30 литри на квадратен метар за 24 часа. Од УХМР велат и дека локално се очекува невреме со засилен ветер со брзина од над 60 километри на час и појава на ретки грмежи.
