Лидерот на СДСМ, Венко Филипче, денеска соопшти дека ќе го предложи д-р Александар Трајановски за нов потпретседател на партијата. Предлогот ќе биде презентиран на седницата на Извршниот одбор, закажана за 18 часот. За назначувањето да стане официјално, потребно е да го одобри и Централниот комитет, но засега седница на највисокото партиско тело не е закажана.
Филипче истакна дека процесот на кадровски промени се одвива внимателно и побара трпение од членовите и симпатизерите.
„Вечерва ќе го презентирам дел од плановите. Сакам да најавам дека на позицијата потпретседател ќе го номинирам доктор Александар Трајановски, актуелен член на Извршниот одбор. Тој е исклучително посветен кадар, имаше одлична кампања и привлече многу внимание. Верувам дека ова ќе биде значајно кадровско зајакнување“, рече Филипче.
Трајановски, кој беше кандидат за градоначалник на Аеродром на локалните избори, ќе биде предложен како наследник на Ана Чупеска, која поднесе оставка по изборите во 2025 година.
Филипче ги демантираше медиумските написи дека бил одбиен од поранешен градоначалник, оценувајќи ги како апсолутни невистини.
„Нема таков човек што одбил некаква понуда. Тоа не е точно“, истакна тој, додавајќи дека владејачката ВМРО-ДПМНЕ се занимава со измислени теми наместо да даде одговори за економските предизвици.
