Дубаи, кој лани пречека 19,59 милиони меѓународни посетители и се позиционираше како една од најпосетуваните дестинации во светот, сега се соочува со драстичен пад на туризмот поради војната во регионот. Во изминатиот месец, конфликтот го наруши авиосообраќајот, ја намали побарувачката и силно ги погоди хотелите, рестораните и туристичките компании.
Најсилно погоден е угостителскиот сектор. Дел ресторани пријавуваат пад на приходите од над 50 проценти, а оние што најмногу зависат од туристи бележат и пад од 70 до 80 проценти. Поради тоа, некои компании веќе ги намалуваат платите и се обидуваат да избегнат откази, но предупредуваат дека таквите мерки можат да траат само кратко.
Пополнетоста на хотелите во Дубаи паднала на само 15 до 20 проценти од вообичаеното ниво за овој период, а некои луксузни хотели на Palm Jumeirah ги намалиле цените и до 50 проценти за да привлечат локални гости. Дел хотелски групации привремено затвораат објекти или делови од нив за да ги намалат трошоците.
Проблемот е и поширок од туризмот. Регионалната војна го наруши и воздушниот сообраќај, а Дубаи, како еден од најважните светски транзитни центри, директно го чувствува тоа. Минатата година меѓународниот аеродром во Дубаи опслужил 95,2 милиони патници, но по почетокот на конфликтот имаше масовни откажувања на летови и прекини во редовниот сообраќај, додека Emirates засега лета со намален распоред.
Последиците веќе се гледаат и на пошироката економија.
Особено ранливи се странските работници, кои се столб на хотелскиот и ресторанскиот сектор во Дубаи. Поради падот на побарувачката, на дел од нив им е скратено работното време, а други се испратени на неплатен одмор.
Во обид да ја ублажат штетата, властите во Дубаи најавија пакет економска поддршка вреден 1 милијарда дирхами, односно околу 272,26 милиони долари, со мерки што треба да важат од три до шест месеци. Дел од олеснувањата се однесуваат и на хотелите, на кои ќе им биде дозволено одложено плаќање на одредени туристички давачки.
