Европската унија предложи фиксна такса од две евра за милијарди мали пакети испратени директно во домовите на луѓето, кои во моментов доаѓаат претежно од Кина. Новиот данок би значел дека пакетите во вредност помала од 150 евра повеќе нема да бидат ослободени од царина.
„Од онлајн пазарите, вклучувајќи ги кинеските гиганти Тему и Шеин, се очекува да платат такса“, рече комесарот на ЕУ за трговија, Марош Шефчович.
Минатата година, во ЕУ влегоа 4,6 милијарди вакви пакети, од кои повеќе од 90 проценти дојдоа од Кина. Таквиот обем создаде огромен товар за царинскиот персонал на ЕУ, рече Шефчович. Се тврди дека ова претставувало предизвици во обезбедувањето соодветни проверки на безбедноста и стандардите на стоките што влегуваат во блокот. Предложената такса „ќе ги компензира трошоците“, изјави тој пред Европскиот парламент.
Брисел, исто така, се надева дека дел од приходите ќе одат во буџетот на ЕУ. За пакети испратени директно до потрошувачите ќе се наплаќа такса од две евра, додека пакетите испратени до магацини ќе се оданочуваат по пониска стапка од 0,50 евра. Овој потег на ЕУ доаѓа по новите американски царини за кинески стоки под администрацијата на претседателот Доналд Трамп – кои вклучуваат мала пакетна такса.
По преговорите минатата недела, царината за мали пакети во вредност до 800 долари беше намалена од 120 на 54 проценти. Сепак, фиксната такса од 100 долари по пакет останува. Постоеја стравувања дека кинеските гиганти за е-трговија би можеле да го преплават европскиот пазар со евтина стока, бидејќи производите првично наменети за САД ќе мора да се продаваат на друго место.
Европските трговци на мало претходно се жалеа дека се соочуваат со нелојална конкуренција од странски конкуренти, за кои тврдат дека не се придржуваат до строгите стандарди за производи на ЕУ. Шеин и Тему претходно изјавија дека ќе соработуваат со регулаторите и стандардите за потрошувачите. Тему тврди дека има 92 милиони корисници во ЕУ, додека Шеин тврди дека има над 130 милиони.
Пред американските царини, платформите како „Шеин“ и „Тему“ се потпираа на таканареченото ослободување „de minimis“ за директно испраќање на производи со ниска вредност до клиентите во САД без плаќање царински давачки или увозни даноци.
