Европската комисија објави дека ги казнила луксузните модни куќи Gucci, Chloé и Loewe со вкупно 157,4 милиони евра за мешање во политиките за цени на трговците на мало.
Gucci мора да плати казна од 119,7 милиони евра, Chloé 19,7 милиони и Loewe 18 милиони евра. Брисел ги намали износите за сите три компании бидејќи тие соработуваа во истрагата и обезбедија докази. Брендовите со седиште во Италија, Франција и Шпанија нелегално ги одредуваа цените на своите производи за трговците на мало, откри Комисијата.
Потпретседател на Европската комисија: Одлуката испраќа силен сигнал
„Особено, три модни куќи се мешаа во комерцијалните стратегии на своите трговци на мало со наметнување ограничувања, како што е барањето да не отстапуваат од препорачаните малопродажни цени, максималните попусти и специфичните периоди за продажба“, се вели во соопштението на ЕК.
Ваквите практики резултираат со повисоки цени и го ограничуваат изборот на потрошувачите, заклучија тие во Брисел. Прекршувањето на прописите траело неколку години и ја опфаќало целата територија на Европската унија.
„Сите потрошувачи во Европа заслужуваат придобивки од вистинска ценовна конкуренција, што и да купат и каде и да купат, онлајн или офлајн. Одлуката испраќа силен сигнал до модната индустрија и пошироко дека нема да толерираме вакви практики во Европа и дека фер конкуренцијата и заштитата на потрошувачите важат подеднакво за сите“, изјави потпретседателката на Европската комисија, Тереза Рибера.
Реакции од казнетите модни куќи
Сопственикот на Гучи, Керинг, нагласи за Ројтерс дека истрагата на ЕУ е завршена по соработката, додавајќи дека износот на казната го евидентирал во деловните резултати на групацијата за првата половина од годината.
Лоу, исто така, потврди дека постигнал спогодба со ЕУ, нагласувајќи дека има намера „строго да ги почитува“ правилата за конкуренција во идното работење. Клое рече дека го сфаќа прашањето „исклучително сериозно“, додавајќи дека од 2023 година, кога ЕУ отвори истрага, ги заострил мерките за да обезбеди усогласеност.
