Нова студија открива дека јапонската традиционална исхрана не само што го подобрува физичкиот изглед, туку го намалува ризикот од хронични болести.
Традиционалната јапонска кујна, позната како „вашоку“, се базира на зеленчук, морски алги, тофу, печурки, мисо супа, зелен чај и масна риба, како и ограничено консумирање црвено месо и преработена храна.
Новата студија заснована на исхраната, кај повеќе од 12.000 работоспособни Јапонци во текот на три години покажала дека, оние кои најдоследно го следат овој стил на исхрана, имаат 17-20% помал ризик да развијат депресија, дебелеење или лично незадоволство во споредба со лицата кои имаат лоши навики и поинаков начин на исхрана.
Тајната е во комбинацијата на важните хранливи состојки, како омега-3 масните киселини од рибата, антиоксидансите од зеленчукот и алгите и пробиотиците од ферментираните производи, како мисо супата и тофу-то, како и ниската количина шеќер и заситени масти.
Овие состојки заедно спречуваат воспаленија во телото, ја јакнеат мозочната функција, го подобруваат расположението и го поддржуваат здравото варење на храната, а исто така превенираат депресија.
Јапонската храна подразбира мали порции од разни оброци и навиката позната како „hara hachi bun me“ (престанување со јадење кога си 80% сит). Оваа филозофија помага во одржувањето на нормална телесна тежина, спречува прејадување и го подига нивото на енергија. Токму затоа Јапонците се витки, без брчки на лицето и со оптимална енергија и после 50-тата година од животот.
Јапонската исхрана е едноставна, разновидна и се базира на свежи, минимално обработени состојки. Типичен јапонски појадок вклучува порција варен ориз, мисо супа, парче риба на скара, варен зеленчук и мала порција ферментирани состојки како „натоа“ ( ферментирана соја). За ручек и вечера чести се оброците суши, риба на пареа, супа од морски алги, динстан зеленчук, а како напиток користат зелен чај.
Наместо леб и тестенини консумираат интегрален ориз и нудли од хељда. Вообичаени ужини се едамаме, (млади варени мешунки соја),тофу салати, овошје или супа од алги. Слатки јадат ретко и тоа најчесто се лесни десерти од оризово брашно или црвен грав. Храната се јаде во мали порции со големо внимание и ритуали на благодарност кои допринесуваат за здравиот однос кон истата.
Познато е дека јапонската исхрана на островот Окинава вклучува сладок компир, мешунки и минимална количина месо, што доведува до долговечност и низок индекс на телесна маса кај оваа популација.
