Здружението „Инженери на Република Македонија“ објави дека доставило поднесок до Владата и до Министерството за транспорт, со молба да се елиминира можноста трасата на идниот експресен железнички правец да минува низ просторот наменет за реализација на проектот „Вардарска долина“.
„Во време кога светот се стреми кон обновливи извори на енергија и одржлив развој, „Вардарската долина“ се наоѓа на крстопатот на историската одлука на оваа Влада која ќе го одреди правецот на нашата енергетска иднина.“
Дванаесетте хидроцентрали планирани во овој предел не се само градежни проекти – тие претставуваат стратешки темел на националната економија, извор на чиста, еколошка енергија и значаен потенцијал за раст и напредок на Македонија, истакнуваат од Здружението.
Според нив, изградбата на хидроцентралите во „Вардарската долина“ ќе донесе многубројни економски бенефиции.
„Тие ќе овозможат значително намалување на зависноста од фосилните горива, ќе ја зајакнат енергетската сигурност на земјата, акумулациите и системите за наводнување ќе го зголемат приносот во земјоделството, ќе се обезбеди стабилно управување со водните ресурси и заштита од поплави, а ќе се обезбеди и заштита на плодното земјиште преку намалување на ерозијата.“
„Придобивките од обновливата енергија се инвестиција не само во денешницата, туку и во иднината на нашите деца и внуци.“
Сепак, потенцијалот на овој проект е доведен во прашање од актуелните планови за трасата на брзата пруга, која, доколку се реализира по постоечкиот колосек, ќе ја исклучи можноста за развој на хидроенергетските капацитети во Вардарската долина.
„Ова не е само техничко прашање, туку морална и еколошка одговорност да не им го одземеме правото на идните генерации да ја користат енергијата и придобивките од акумулациите што Вардарската долина може да ги понуди,“ стои во објаснувањето.
Од Здружението веруваат дека, ние, како заедница, мораме да ги сочуваме сите опции за развој и користење на природните богатства на најодржлив можен начин.
„Затоа цениме дека трасата на брзата пруга може да биде адаптирана на локации каде би ги зачувала просторните можности на Вардарската долина овозможувајќи притоа истовремено и модерна транспортна инфраструктура и развој на хидроенергетиката.“
„Затоа ја повикуваме Владата и Министерството за транспорт да не го нарушуваат концептот „Вардарска долина“ бидејќи само така можеме да ја обезбедиме иднината што ја заслужуваме – иднина во која енергијата тече слободно по Вардар, а со неа и просперитетот за сите нас.“
„ВАРДАРСКА ДОЛИНА Е КОЛОСЕК НА НАШАТА ИДНИНА,“ се наведува во соопштението.
