Иранските власти објавија нова карта на Ормутскиот теснец, потег што медиумите и аналитичарите го толкуваат како директна геополитичка порака до американскиот претседател Доналд Трамп. Картата се појавува во време кога повторно растат тензиите околу стратешкиот морски премин низ кој минува значителен дел од светската трговија со нафта.
Според медиумските извештаи, Иран со новата мапа сака да покаже дека има целосна контрола врз регионот и дека нема намера лесно да попушти под американскиот притисок. Ормутскиот теснец со месеци е во центарот на дипломатски и воени закани меѓу Вашингтон и Техеран.
Доналд Трамп претходно изјави дека Иран „не може да ги уценува САД“ со можноста за затворање на теснецот и предупреди дека Вашингтон нема да дозволи блокада на еден од најважните светски поморски коридори. Од друга страна, иранските претставници повеќепати порачаа дека Техеран има право да воведе контроли и ограничувања доколку продолжат притисоците и санкциите.
Во последните месеци ситуацијата околу Ормутскиот теснец неколкупати доведе до глобална загриженост поради можни нарушувања на испораките на нафта и ризик од поширок конфликт на Блискиот Исток. Имаше информации за ограничувања на движењето на бродови, закани за блокада и воени активности во регионот.
Ормутскиот теснец се смета за една од најважните точки за светската економија бидејќи преку него минува голем дел од глобалниот извоз на нафта и течен природен гас. Секоја ескалација во регионот веднаш влијае врз светските пазари и цените на енергенсите.
