Кандидатот за градоначалник на Општина Карпош од редовите на ВМРО-ДПМНЕ, Сотир Лукровски, денеска преку социјалните мрежи најави дека подземните гаражи во општината повторно ќе бидат ставени во функција за која се наменети – паркирање и олеснување на секојдневието на граѓаните.
Неговата објава доаѓа по реакциите на жителите на Карпош, кои укажуваат дека голем дел од гаражите се оставени празни, запуштени или претворени во магацински простор, додека тротоарите остануваат блокирани со возила.
„Подземните гаражи треба повторно да бидат ставени во функција за која се наменети, со јасни правила, соодветна заштита и современи решенија. Подготвени сме да иницираме и законски измени доколку тоа е потребно, бидејќи интересот на граѓаните секогаш мора да биде на прво место,“ истакна Лукровски.
Тој нагласува дека безбедноста, редот и јавниот простор се право на секој човек, а целта е Карпош да стане средина каде граѓаните ќе се чувствуваат сигурно и ќе ја добиваат вистинската вредност на својот имот.
