Специјалниот претставник на американскиот претседател Доналд Трамп за Украина оцени дека мировниот договор за ставање крај на војната е „навистина близу“ до финализирање. Тој посочи дека процесот е стопиран само поради две клучни нерешени прашања: статусот на регионот Донбас и идното управување со нуклеарната електрана во Запорожје.
Русија ја започна инвазијата врз Украина во февруари 2022 година, продолжувајќи го конфликтот што претходно осум години се водеше меѓу проруските сили и украинската армија во областите Доњецк и Луганск. Овој судир се смета за најсмртоносниот во Европа по Втората светска војна и доведе до најголема политичка и безбедносна криза меѓу Западот и Москва од времето на Студената војна.
Американскиот преговарач Кит Келог, кој треба да ја напушти функцијата во јануари, на Националниот одбранбен форум на Реган оцени дека процесот на разговори е во завршна фаза, нагласувајќи дека последните чекори се најпредизвикувачки:
„Речиси сме на целта. Навистина сме многу, многу блиску“, рече тој, додавајќи дека мировниот договор е во „последните 10 метри“.
Келог посочи дека отворените прашања се однесуваат на тоа како ќе се регулира идниот статус на Донбас и кој ќе ја контролира нуклеарната централа Запорожје – најголемиот објект од овој тип во Европа, кој моментално е под руска управа.
„Ако ги решиме тие два проблема, мислам дека остатокот од работите ќе се реши прилично добро“, истакна тој.
Еден од почетните американски предлози предвидува централата во Запорожје, чијашто работа е стопирана и реакторите се во ладен режим, да биде повторно активирана под надзор на Меѓународната агенција за атомска енергија (МААЕ), а произведената електрична енергија да се дели подеднакво меѓу Русија и Украина.
