Кинеските директни инвестиции во Европа минатата година пораснаа втора година по ред и достигнаа 16,8 милијарди евра, што е највисоко ниво од 2018 година, покажува најновото истражување на аналитичките куќи „Родиум груп“ (Rhodium Group) и „МЕРИКС“ (MERICS).
Вкупниот раст од 67 проценти во споредба со 2024 година беше предводен од процесите на спојувања и преземања (M&A), кои на годишно ниво забележаа скок од 89 проценти, достигнувајќи 7,9 милијарди евра.
Сепак, и натаму доминираат кинеските „гринфилд“ инвестиции (директни вложувања во нови капацитети), кои во 2025 година беа за 51 процент поголеми во однос на претходната година и достигнаа рекордни 8,9 милијарди евра. Во анализата се наведува дека Европа во 2025 година апсорбирала речиси една четвртина од глобалните кинески директни странски инвестиции.
Иако главна дестинација за кинеските инвестиции на европскиот континент и натаму е Унгарија, повторно е регистриран поголем прилив на капитал и во Германија и Франција. Унгарија минатата година привлече кинески инвестиции во вредност од 3,9 милијарди евра, по што следуваат Германија со 2,5 милијарди и Франција со 1,9 милијарди евра.
Уделот на Германија во вкупните кинески директни инвестиции во Европа со тоа се зголеми на 15 проценти, во споредба со 10-те проценти во 2024 година, додека уделот на Франција порасна на 12 проценти од претходните пет отсто.
Автомобилската индустрија привлече најмногу кинески капитал во Европа – 7,6 милијарди евра, од кои дури 93 проценти беа насочени кон синџирите на снабдување за електрични возила. Сепак, уделот на овој сектор во вкупните кинески инвестиции се намали на 45 проценти, за разлика од 52-та проценти во 2024 година. Се наведува и дека секторот за забава минатата година привлекол кинески директни инвестиции од 2,3 милијарди евра, додека секторот на услуги привлече две милијарди евра.
Во анализата се оценува дека, иако „гринфилд“ инвестициите достигнаа рекордно ниво, падот на вредноста на новонајавените трансакции укажува на можно слабеење на динамиката во овој сектор во наредните години. Во 2025 година беа најавени нови кинески инвестиции во производствени погони и опрема во вредност од 5,2 милијарди евра, во споредба со 5,7 милијарди во 2024 и дури 16,9 милијарди евра во 2023 година.
Истражувањето покажа и дека кинескиот извоз во Европа продолжува да расте, што ја одразува континуираната отвореност на европскиот пазар за производи од Кина. Вредноста на кинескиот извоз на стоки во Европа во 2025 година порасна за девет проценти, при што извозот на батерии е зголемен за 43 проценти, на автомобили за 15 проценти, а на опрема за ветерна енергија за дури 65 проценти.
