Во последниве денови слушаме смешни обиди за манипулација, истите луѓе кои ја водат Општина Карпош со години, сега се обидуваат да ме прикажат како дел од некакви матни приказни. Јас не ја водам Oпштината, тие ја водат. И токму таму лежи проблемот, вели Сотир Лукровски, кандидат за градоначалник за општина Карпош од редовите на ВМРО-ДПМНЕ.
-Денес Карпош е заробен од истите интереси што ја претворија секоја зелена површина во градилиште, што ги исполнија улиците со прашина, а буџетот со сомнежи.
Тие што денес глумат борци за морал се истите што потпишаа десетици спорни и нелегални ДУП-ови, со кои се уништи ликот на општината.
Тие се луѓето кои дозволија кај булеварот 8 Септември да никне облакодер на спорна локација.
Под нивно водство се планираат да никне огромно бетонско чудовиште кај Алумина, да никнат уште пет згради на Прашка, се планира проширување на Настел во ново издание, се турка трговски центар пред зградата на Горење и City Mall, а и нова зграда пред СЦ „Борис Трајковски“.
И тоа е само дел од еден куп ДУП-ови се донесени „под маса“, зад грбот на граѓаните, со сериозни закани за квалитетот на живеење во Карпош.
И сето тоа се случува додека истите луѓе измислуваат приказни за „Скопје на вода“ или „Карпош на вода“ кои се тешки глупости без ниту еден аргумент, измислици создадени само за да се плука и манипулира.
Нема програма, нема визија, само очајнички обиди да се одвлече вниманието од вистински проблеми и сопствените дела или не дела.
Карпош не сака повеќе празни зборови и лажни обвинувања, сака нова политика.
Политика со јасна програма, каде што секој денар на граѓаните ќе биде видлив и оправдан.
Јас нудам план за транспарентна и модерна општина, за чист воздух, за уреден урбан развој и крај на партиските тендери.
И тоа не е ветување, тоа е обврска.
Доста беше од луѓе што со години ја држат општината во раце и мислат дека сите ќе заборават што направиле.
Карпош не е нивна приватна фирма, Карпош е на граѓаните, и така и ќе биде за многу кратко кога јас ќе бидам градоначалник, порача Лукровски.
