Луксембург минатата година забележа најбрз раст на бројот на милионери во Европа, со зголемување од 13,5 отсто на лица со инвестициско богатство над еден милион американски долари, покажува новиот извештај World Wealth Report на компанијата Capgemini. Со овој резултат, малата, но финансиски моќна држава ги надмина поголемите европски економии, вклучувајќи ја Германија и Франција.
Според податоците, во пресметката се вклучува само финансиската имотна состојба што може да се инвестира, без вредноста на недвижноста во која живее сопственикот. Растот во Луксембург се поврзува со позитивните движења на светските берзи, особено со силниот раст на акции поврзани со вештачка интелигенција и технолошкиот сектор.
На европско ниво, бројот на милионери пораснал во просек за 6,5 отсто, по падот во претходната година. Извештајот укажува дека растот на богатството е концентриран кај мал дел од популацијата, при што 1% од најбогатите контролираат значителен дел од вкупното богатство. Глобално, бројот на милионери достигнал 25,3 милиони лица, а најсилен раст е забележан во Азија и Пацификот, додека единствен пад е регистриран на Блискиот Исток.
