Министерот за надворешна политика и надворешна трговија, Тимчо Муцунски и унгарскиот министер за надворешна политика и трговија Петер Сијарто во Будимпешта потпишаа акциски план за размена на експертиза од страна на Унгарската дипломатска академија за јавни службеници на меѓусебно договорени теми за интеграција во ЕУ, процесите на администрацијата на Министерството за надворешни работи и надворешната трговска политика.
Со средбата Муцунски – Сијарто почнаа активностите во рамки на унгарско-македонскиот владин самит што денеска и утре ќе се одржи во Унгарија. Во македонската владина делегација која ја предводи премиерот Христијан Мицкоски се 10 министри и двајца заменици министри.
Министерот за надворешни работи и надворешна трговија искажа благодарност за поддршката што Унгарија ни ја дава на патот кон ЕУ, но и за нашето партнерство во НАТО.
Сијарто, пак, рече дека потпишувањето на документот е убав вовед за меѓувладината седница, најавувајќи интензивирање на соработката.
Унгарскиот министер на прес-конференцијата заборуваше и за случувањата поврзани со војната во Украина, посочувајќи дека благодарение на промените на другата страна на Атлантикот се можни промени.
Македонците и Унгарците сме заинтересирани истовремено за враќање на мирот. Тоа се покажа минатата недела во ОН, рече Сијарто.
Шефот на македонската дипломатија во однос на Украина рече дека државата се залага за безусловно и што е можно поскоро постигнување мир и безбедност во светот, посетувајќи дека заедно со Унгарија минатата недела бевме коспонзори на Резолуција за мир во Украина.
Согласно агендата, предвидени се тет-а-тет средба меѓу двајцата премиери, како и билатерални средби меѓу ресорните министри на двете влади, по што утре ќе следи и заедничката седница на двете влади.
