МВР поднесе кривични пријави за злоупотреба на службена положба и перење пари и други приноси од казниво дело против 12 физички и едно правно лице. Едно лице е во бегство, а едно е веќе в притвор, според официјалните информации. Меѓу оние кои се гонат се газдата на РКМ, Ратко Капушевски и неговиот бизнис-партнер Ерџан Сулкоски, а исто во евиденцијата е и сопственикот на „Пуцко Петрол“, Асмир Јахоски. Иницијалите се поклопуваат со имињата на поранешниот директор на ЕСМ, Васко Ковачевски, и комерцијален директор на ЕСМ,Адријан Муча.
„На 10.03.2025 спроведена е полициска акција од страна на Министерството за внатрешни работи во координација со ОЈО за ГОКК, при што врз основа на обезбедени наредби од Основен кривичен суд извршени се претреси на повеќе локации на подрачје на Скопје, Битола и Кичево, кај правни и физички лица, во врска со сторени кривични дела поврзани со сомнителни набавки на деривати.
Во рамки на акцијата лишени од слобода се 11 лица, едно лице е недостапно за органите на прогонот и едно е со мерка притвор. До сега, од извршените претреси пронајдени и одземени се документација, пет мобилни телефонски апарати, околу 1500 парчиња муниција од различен калибар, два пиштоли и три патнички моторни возила“, соопштено е од истрагата.
13-те физички и едното правно лице се: В.К. (55) од Битола, А.М. (44) од Скопје, Н.С. (61) од Општина Маврово и Ростуше, Е.П. (52) од Скопје, М.Н. (60) од Скопје, Б.М. (51) од Скопје, Р.Р. (48) од општина Желино, Д.С.Ј. (43) од Куманово, Д.С. (66) од Скопје, Д.С. (43) од Велес, Р.К. (38) од Скопје, Е.С. (43) од Кичево и А.Ј. (40) од с.Пласница и правно лице од Скопје.
МВР по насоки на надлежниот јавен обвинител ќе продолжи со преземање на понатамошни полициски активности и дејствија со цел обезбедување на други докази поврзани и со други кривични дела“, додаваат од МВР.
