Германскиот производител на автомобили Мерцедес-Бенц планира да премести дел од своето производство на возила од Берлин во Полска како одговор на растечката конкуренција од Кина и високите оперативни трошоци во Германија. Мерцедес постепено ќе ги прекине операциите во својата фабрика во Лудвигсфелде во близина на Берлин до крајот на 2029 година, каде што моментално вработува над 2.200 луѓе. Фабриката, столб на индустријата во Бранденбург повеќе од 30 години, годишно произведува приближно 60.000 специјализирани варијанти на комбиња и електрични возила „Спринтер“, објавува полскиот канал ТВП Ворлд.
Производството на е-Спринтер, електрична верзија на популарниот комби за достава, ќе биде преместено во Полска, предизвикувајќи контроверзии меѓу германските синдикати и локалните власти.
Обијас Кунцман од синдикатот ИГ Метал, најголемиот синдикат во земјата, објави дека ќе има протест во Лудвигсфелде, наведувајќи дека одлуката е неприфатлива.
Според германските медиуми, трошоците за работна сила во Германија моментално се пет пати повисоки отколку во Полска, која е втор најголем производител на батерии за електрични возила во светот, по Кина. Германскиот автомобилски гигант ќе изгради нова фабрика во Јавор во југозападна Полска, каде што Мерцедес-Бенц ќе произведува мотори и батерии за хибридни автомобили од 2019 година.
Мерцедес има за цел да создаде најмалку 300 нови работни места до 2027 година, вклучувајќи 30 за лица со високо образование, како дел од проектирана инвестиција од 1,528 милијарди злоти (360 милиони евра), објави полскиот весник „Жешчпосполита“.
