Неколку стотици кочанчани попладнево, како и изминатите денови, одржаа мирен протестен марш, барајќи правда за обезбедувачите од дискотеката „Пулс“ кои се осомничени за трагичниот пожар во кој загинаа 60 млади луѓе.
Поворката, во која беа и роднини на дел од загинатите и повредените, во тишина помина низ градските улици. Организаторите бараат да се преиспита наводната вина на обезбедувачите, кои според бројни сведоштва, кобната ноќ спасиле многу животи.
За утре, пак, во Кочани е најавен „Марш на ангелите“, на кои роднините на настраданите ќе побараат правда за нивните блиски кои трагично загинаа. Според најавата, протестниот марш ќе започне од Градскиот парк и ќе се движи кон Трговскиот центар, зградата на Општина Кочани, полицијата и ќе заврши пред Основниот суд и обвинителството во Кочани.
„Ве известуваме дека маршот е единствено организиран од семејствата на починатите во пожарот во Кочани, не е за поддршка на обезбедувањето и ги замолуваме сите граѓани да го почитуваат ова и да не се приклучуваат доколку целосно не го прифаќаат маршот и неговата реализација“, соопштија организаторите на тој настан.
„Сакаме јасно да потенцираме дека ние сме согласни да се врши снимање на настанот со цел јавноста да знае дека за правдата на нашите деца ќе се бориме до крај и нема да застанеме ниту за момент“, додаваат тие.
