Безбедноста во Македонија е стабилна и во моментов нема закана од воените активности што се одвиваат на Блискиот Исток, изјави премиерот Христијан Мицкоски. На шестиот ден од вооружените судири меѓу Иран, САД и Израел, како и државите од Персискиот Залив каде што САД имаат воени бази, нашите разузнавачки служби не очекуваат проширување на конфликтот на Западен Балкан.
-Што се однесува до безбедносната состојба во државата, таа е стабилна и мирна. До овој момент не постои ризик за безбедносната состојба во земјата. Бевме на состанок на Советот за безбедност што го организираше претседателката, направивме анализа врз основа на информациите што ги добивме од службите, но и од надлежните министерства – тука мислам на Министерството за одбрана и Министерството за внатрешни работи. Врз основа на тие податоци можам да ги информирам граѓаните дека безбедносната состојба е стабилна, вели премиерот Христијан Мицкоски.
Во однос на евакуацијата на нашите државјани кои се наоѓаат во зоните на конфликтот, премиерот рече дека државата ќе ги покрие трошоците за транспорт. Денес попладне со владиниот авион од Израел кон Скопје се очекува да пристигнат неколку државјани, како прва група евакуирани. Властите велат дека со тоа ќе заврши процесот на враќање на сите државјани кои побарале евакуација од Израел.
-Од денес почнува евакуацијата. За сите што бараат враќање од Бахреин, Катар и Обединетите Арапски Емирати веќе обезбедивме лет и државата ќе ги плати трошоците. Дел од оние што се во Израел и околните земји исто така ќе бидат евакуирани. Секој што се наоѓа во регионот каде што има воени дејства треба само да ги следи соопштенијата на Министерството за надворешни работи, вели премиерот Христијан Мицкоски.
