Претседателот на ВМРО-ДПМНЕ, Христијан Мицкоски, денеска го претстави новиот состав на Извршниот комитет на партијата, како и новиот генерален секретар, во рамките на процесот на обнова, јакнење и модернизација на партијата.
– Денес заседаваше Централниот комитет на ВМРО-ДПМНЕ, на кој беа донесени важни одлуки за понатамошното јакнење и модернизација на партијата. Нашата цел е создавање силна, ефикасна и обединета структура која ќе даде конкретни и одговорни решенија за потребите на граѓаните – изјави Мицкоски пред присутните медиуми.
Како што најави, партијата ќе продолжи со отворање кон нови идеи и кадри, со фокус на транспарентност, инклузивност и подобрување на организацијата.
– Во периодот што следува, ќе имаме избор на претседатели на општинските комитети, како и нови раководства на Унијата на жени, Унијата на млади сили и Унијата на ветерани, со јасна визија за иднината и со фокус на квалитет, одговорност и резултати – додаде Мицкоски.
Нов генерален секретар е пратеникот Драган Ковачки, додека новиот Извршен комитет се составува од искусни партиски лица и нови членови, вклучувајќи:
Александар Николоски – министер за транспорт и потпретседател на Владата
Владо Мисајловски – министер за одбрана
Гордана Димитриеска-Кочоска – министер за финансии
Тимчо Муцунски – министер за надворешни работи и надворешна трговија
Ѓорѓија Сајкоски – досегашен генерален секретар
Антонијо Милошоски – потпретседател на Собранието
Орце Ѓорѓиевски – градоначалник на Скопје
Кирил Пецаков – градоначалник на Охрид
и други истакнати членови на партијата од Владата и локалната самоуправа.
Дополнително, во составот ќе се приклучат новите претседатели на Унијата на жени, Унијата на млади сили и Унијата на ветерани, како и организацискиот секретар Ивица Томовски и шефот на кабинетот Владимир Нелоски.
– Во услови кога опозицијата не нуди решенија и е целосно безидејна, знаеме дека решението е силен граѓански инпут за стабилна и обединета ВМРО-ДПМНЕ. Продолжуваме по патот на обнова, обединување и подготовка за нови изборни победи, со една јасна цел – подобар живот за сите граѓани – заклучи Мицкоски.
