Утрово стапија на сила рекордните американски царини за кинески увоз, кои ќе достигнат дури 104 отсто за многу производи.
Некои производи, како што се автомобили, чипс, челик и алуминиум, сè уште ќе подлежат на пониски царини, но повеќето други увозни категории од Кина ќе бидат предмет на целосни царини.
Засега Пекинг не покажува знаци на попуштање и најавува нови контрамерки против американскиот увоз. Но, некои аналитичари веруваат дека овие царини може сериозно да влијаат на кинеската економија и да ја принудат да претрпи структурни промени.
Дан Ванг од консултантската компанија Eurasia Group истакнува дека секоја царина над 35 отсто ќе ги избрише сите профити на кинеските компании кои извезуваат во САД или Југоисточна Азија.
Се што е над тоа ниво е симболично“, рече Ванг, цитирајќи бројки од индустријата.
Таа, исто така, предупреди дека Кина би можела да ја пропушти целта за годишен раст од околу 5 отсто доколку економијата се затвори за меѓународната трговија.
„Растот ќе биде значително помал бидејќи извозот и надворешната побарувачка придонесоа од 20 до 50 отсто во вкупниот економски раст по пандемијата“, додаде таа.
Тим Вотерер од брокерската куќа КЦМ Трејд се согласува дека царините од 104 отсто нема да бидат одржливи за Кина на долг рок, со оглед на нејзината извозно ориентирана економија.
„Краткорочно тие можат да се справат, но на долг рок тоа бара структурни промени – како потпирање на домашната потрошувачка“, рече Вотерер.
