На светскиот ден на наставниците ресорното министерство во земјава преку национална кампања ќе ја крева јавната свест за важноста и значењето на наставниците во општеството.
Целта како што велат е да се посочи дека тие се важна алка во образовниот систем, а кампањата ќе ја спроведуваат преку социјални мрежи, дебати и панел дискусии. Сепак, министерката за образование вели дека е свесна за предизвиците, и за проблемите кои ги оцени како системски.
-Големи се предизвиците со коишто се соочуваат наставниците ако учениците ни се меѓу последните на ПИСА, факултетот не ни е ни меѓу илјадите, нели најголемиот, УКИМ на Шангајската листа. Ние имаме системски проблем и треба и системски да го решаваме. Владата презема бројни активности, почнувајќи од нивниот социјален статус, со покачување на нивните плати, Весна Јаневска.
Јаневска повтори и дека министерството вложува напори да го врати УКИМ на Шангајската листа. По изборите, вели дека на сила ќе стапат измените во Законот за високото образование со што очекува да се зголемат и критериумите за избор на професорите.
-Многу преземаме и претпоставувам дека веќе и е познато на јавноста. Прво би рекла дека веднаш после изборите го стартуваме новиот закон за високо образование и научно-истражувачка дејност и квалитет во високото образование кои значајно ќе ги поткренат критериумите за избор на наставниците,- – Весна Јаневска.
На УКИМ инаку, годинава се запишале 5.100 студенти што е за 300 повеќе од лани, а запишани се и 400 странски студенти. Универзитетот минатото година се наоѓаше на листата 2.000 најдобри светски универзитети на 1.990 место, а годинава веќе не е дел ниту од таа листа.
