Над 600 маскирани беа дел од големото карневалско дефиле во центарот на Прилеп како кулминација на карневалските свечености по 23-ти пат. На карневалот учествуваа и млади и стари, и не само од Прилеп, туку и од Куратица, Охридско, Пробиштип, Бегниште…. Имаше современи и традиционални маски: „Весели пирати од Пробиштип“, „Клеопатра во Куратица“, „Арката на дедо Ное“, „Го пратиле дедо в планина“, ангели и демони. Маскираните испратија пораки да се подобри светот и односите меѓу луѓето.
Големото карневалско дефиле го предводеа прилепските мечкари- заштитната маска на карневалот.
Мечкарите се тука да ги избркаат злите духови. Ги бркавме и ќе продолжиме додека сите не ги избркаме. Вековната традиција која ја воспоставија касапите и еснафот продолжува зашто имаме подмладок. Во „Прилепските мечкари“ се преку 45 возрасни и пет мали, до петгодишна возраст. Ниту дождот, ниту ветрот не може да ги запре мечкарите. А дождот е како знак дека треба да ги исчистиме и да си ги простиме големите гревови, изјави Тони Павлески од здружението „Прилепски мечкари“.
Прилепскиот градоначалник Борче Јовчески го нагласи чинот на простување на Велики поклади- Прочка. -Тука сме да подариме љубов и разбирање, да простиме за сторените гревови и да ни се прости. Карневалската традиција во Пирлеп е вековна и ја одржуваме, порача Јовчески.
До вечер стручното жири ќе ги прогласи најдобрите маски на годинашниот карневал, а утре, на Чуст понеделник кога почнувата постите, здружението „Прилепски мечкари“ традиционално поканува на посен грав во манастирот „Свети Ѓорѓија“ кај прилепското село Присад.
Дел од тридневните карневалски свечености во Прилеп беше и изложбата на повеќе од 800 маски на учениците од прилепските училишта и презентацијата на прочкарските обичари- амлање јајце.
