Кризниот штаб е активиран и ќе има телефонски број на кој граѓаните можат да се обратат за помош и снабдување со вода за пиење. Ова се дел од мерките кои општина Гостивар ќе ги спроведува од денеска, кажа градоначалникот, Ваљбон Лимани на прес-конференција во Гостивар.
Вонредна седница ќе има општинскиот совет во попладневните часови.
На мој предлог, веќе е активиран „Кризниот штаб“ од нашата општина и набрзо ќе заседава и секако ќе дава и препораки, но и помош на сите граѓани кои имаат потреба за тоа, рече Лимани.
Општината ќе објави и официјален телефонски број на кој граѓаните кои не можат да излезат да земат вода, да се јават и со мобилни екипи да им се доставува до нивните домови, рече градоначалникот.
Тој напомна дека локалната самоуправа е во координација со сите релевантни институции и соработуваат за да како што посочи, дознае вистината.
Со објавување на резултатите, веднаш ќе почнеме со активности за дезинфекција и прочистување на водоводната мрежа и засилени контроли за да се обезбеди пристап до здрава вода, што е можно побрзо, рече градоначалникот Лимани
На новинарско прашање околу преземањето на одговорност за настаната состојба, градоначалникот Лимани напомна дека не чувствува морална одговорност.
