Новиот претседател на Романија, проевропскиот центрист Никушор Дан, математичар школуван на Сорбона, има искуство како активист против неконтролираниот развој на недвижности и корупцијата пред да влезе во политиката. Светските агенции го опишуваат како смирен и методичен, и често е виден како ја носи ќерката на училиште.
Неговиот прв предизвик ќе биде именување на премиер и брзо формирање на ново владејачко мнозинство, со цел да се реши најголемиот буџетски дефицит во ЕУ и да се обиде да се избегне намалување на рејтингот од последната скала на инвестицискиот ранг.
Дан (55), кој вети дека ќе се пресмета со корупцијата, цврсто го поддржува членството на Романија во Европската Унија и НАТО. Во предизборната кампања рече дека поддршката на неговата земја за Украина е од витално значење за сопствената безбедност.
Како независен градоначалник на Букурешт во два мандата, Дан има искуство во преговарање за мнозинство, а доказ за тоа колку е мотивиран е фактот што двапати се кандидирал за највисоката функција во главниот град на Романија пред да биде избран од третиот обид.
Политичката кариера ја започнал како граѓански активист во борбата против букурешката мафија за недвижности. Во 2006 година, реагирајќи на уривањето на куќи од архитектонското наследство и изградбата на високи згради во заштитените населби на Букурешт, како и на намалувањето на бројот на зелени површини, го основа „Здружението за спас на Букурешт“.
Дан во 2020 година стана првиот независен градоначалник на Букурешт, со поддршка на опозициските партии, а повторно беше избран во 2024 година. За време на мандатот се фокусираше на борба против корупцијата, унапредување на јавната инфраструктура и транспарентност во работата на локалните власти.
Неговата најава од 16 декември минатата година дека ќе се кандидира на претседателските избори беше изненадување, со оглед на тоа што претходно изрази намера да отслужи барем уште еден мандат како градоначалник на Букурешт, наведувајќи дека ќе му бидат потребни најмалку два-три мандати „за да среди сè“ во романскиот главен град.
