Во следните 10 дена кандидатите кои имаат намера да ја предводат Државната комисија за спречување на корупцијата и судирот на интереси во Собранието ќе треба да ги дострават своите биографии и потребни документи.
Освен што претседателот на Антикорупциска треба да биде државјанин на Македонија, и да има завршено високо образование, условите велат дека треба да поседува и соодветно работно искуство
„Кандидатот треба да има најмалку 10 години работно искуство, од кои најмалку осум години во областите на откривање или спречување на корупцијата, а воедно и да не им е изречена забрана за врешење на професија и во последните 10 години да не бил пратеник или донатор во некоја политичка партија.“
Според процедурата, кандидатите кои ќе ги исполнат условите ќе имаат интервјуа во собранието во комисијата за избори и именувања. Најдобриот кандидат се бира со 80 пратеници и со бадентер.
Државната комисија за спречување на корупцијата остана без својот шеф, Татјана Димитровска откако таа си поднесе оставка во Собранието. Причината беше жестоките реакции во јавноста кои дојдоа по двете обвиненија за неа од Обвинителството и тоа за оддавање службена тајна и компјутерски фалсификат. Димитровска е дел од случајот „Адетив“ кој се однесува за сомнителна набавка на адетиви за ТЕЦ Неготино и за ЕСМ. Веднаш потоа таа остана и без пасош, а согласно мерките за претпазливост и не смееше да ги врши работни активности во антикорупциска.
Експретседателката на антикорупциска Татјана Димитровска сега е вратена како помошник на главниот државен ревизор, работно место кое и беше во мирување додека таа беше претседател на Државната комисија за спречување на корупција.
