Црногорската полиција го осомничи 18-годишниот Андреј Танасковски, државјанин на Македонија за обидот за убиство на Марко Љубиша, познат како Кан (56), од Будва, пишува црногорски „Вијести“.
Полициската управа на Црна Гора истакнува дека нивните службеници, во соработка и координација со Вишото државно обвинителство во Подгорица, „по преземање на сеопфатни истражни и полициско-обвинителски мерки и дејствија, обезбедиле докази и го расветлиле кривичното дело обид за убиство извршено на 7 август 2025 година, во хотелскиот комплекс Маестрал во Будва“.
Тој бил ранет пред осум дена, на базенот на хотелскиот комплекс во Пржно.
„Со преземање на бројни извидувачки, оперативни, тактички, технички, форензички и доказни мерки и дејствија во координација со Вишото државно обвинителство, полициските службеници брзо го идентификуваа сторителот на ова тешко кривично дело, имено А.Т. (18), државјанин на Македонија. А.Т., користејќи огнено оружје на гореспоменатиот ден, испукал два проектили во правец на М.Љ., кој се здобил со телесни повреди во главата. По извршувањето на кривичното дело, А.Т. избегал во непознат правец“, соопшти Полициската управа.
Оттаму објаснуваат дека на Љубиша веднаш му е укажана медицинска помош и дека по укажаната медицинска помош, тој е пуштен на понатамошно домашно лекување.
Постои основано сомнение дека директниот сторител на кривичното дело А.Т., при планирањето и подготвителните дејствија, го искористил како начин на инфилтрација во спроведувањето на криминалните активности престојот како гостин во хотел под фалсификувана документ – лична карта на име Ј.Г., како државјанин на Република Србија“, соопшти Полициската управа.
Според информациите до кои дошле „Вијести“, тој користел лажен документ за идентификација во кој биле внесени податоците на српскиот државјанин Јован Галиќ, роден во септември 2006 година.
„Полициските службеници, преку темелно планирање на разузнавачки и оперативни мерки, идентификуваа државјанин на Македонија, по што испратија директно барање до полицијата на Македонија, чии активности резултираа со идентификација на сторителот во рок од 24 часа од моментот на извршување на кривичното дело. Полициската управа ја користи оваа можност да им се заблагодари на полициските службеници и органите за спроведување на законот на Македонија, кои дејствуваа во реално време, брзо и во директна комуникација, по барањата на Полициската управа на Црна Гора, и ги обезбедија потребните информации за спроведување на оваа кривична истрага.
