Во вториот круг од локалните избори, кандидатот за градоначалник на Центар од ЗНАМ, Мирослав Лабудовиќ ќе ја има поддршката и од коалицискиот партнер во власта – ВРЕДИ.
Синоќа, на средба со локалните жители од Кале и Дуќанџик оваа поддршка е официјализирана.
На средбата на која покрај Лабудовиќ присуствуваше и новоизбраниот градоначалник на Чаир и еден од лидерите на ВРЕДИ, Изет Меџити со жителите од овие маала кои во најголем дел се со албанска етничка припадност, како и генералниот секретар на ЗНАМ, Горан Минчев, Меџити ги повика жителите од овие населени места на 2 ноември кога ќе се гласа во вториот круг, да му се даде максимална поддршка на кандидатот за градоначалник од Движењето ЗНАМ, поддржан и од ВМРО-ДПМНЕ Мирослав Лабудовиќ.
„Благодарен сум за поддршката од Изет Меџити и неговиот тим – оваа партнерска соработка што успешно функционира на централно ниво, сега се продолжува и локално, за доброто на граѓаните. Заедно ќе го направиме Центар подобро место за живеење – со уредени маала, решени комунални проблеми и поголема грижа за секој жител“, напиша во објава на Фејсбук, кандидатот за градоначалник на Центар, Мирослав Лабудовиќ.
