Поранешниот бугарски пратеник Велизар Енчев побара Бугарија да воведе санкции кон Македонија, обвинувајќи ја за систематско непријателство и кршење на човековите права на Бугарите во државата.
Во објава на неговиот профил на „Фејсбук“, Енчев реагира на, како што ги нарекува, „демонстративните тужби против Бугарите во РС Македонија“, како и на ставовите на премиерот Христијан Мицкоски за малцинствата.
„Софија мора да посегне по оваа екстремна мерка. Македонскиот премиер Христијан Мицкоски и владата во Македонија демонстрираат систематско непријателство кон Бугарија, европските принципи и човековите права. Одбивањето да се вклучат Бугарите во македонскиот Устав – јасна обврска во преговарачката рамка со ЕУ – е очигледно кршење на добрососедството“, напиша Енчев.
Тој ја обвинува Македонија за мешање во внатрешните работи на Бугарија преку, како што вели, тврдењата за „македонско малцинство“ во Бугарија и наведува дека гонењата против Бугарите во земјава претставуваат „груба форма на етничка дискриминација“.
Енчев смета дека Бугарија треба да одговори со конкретни и целни санкции, а не со, како што вели, „празни дипломатски изјави“. Во таа насока предлага четири групи мерки:
1. Финансиски санкции:
– Замрзнување на средствата на функционери од македонската влада, членови на коалицијата на власт и магистрати вклучени во „репресија против Бугарите“.
– Забрана за пристап до бугарскиот банкарски систем за тие лица и нивните бизниси.
2. Економски мерки:
– Суспензија на сите билатерални трговски преференции, особено во енергетиката и инфраструктурата.
– Исклучување на македонски компании од учество во бугарски јавни набавки и аукции финансирани од јавни средства.
3. Мерки во транспортот и логистиката:
– Преглед на сите прекугранични инфраструктурни проекти, вклучително и изградбата на патни и железнички врски, сè додека, како што вели, „Македонија не покаже вистинска промена во својата политика“.
– Откажување на објектите за гранична контрола договорени во рамките на добрососедските односи.
4. Политичка блокада во рамки на ЕУ:
– Целосно блокирање на секое понатамошно придвижување во рамките на Преговарачката рамка на РСМ со ЕУ.
– Иницирање заедничка позиција со други земји-членки на Унијата за, како што вели, „систематско кршење на правата на малцинствата во РСМ“, со цел темата да се постави на ниво на Европскиот совет.
„Бугарија има право на глас во ЕУ и мора да го искористи“, порача Енчев.
