Френк Каприо, американскиот судија од Род Ајленд кој со својата добрина и човечност ги освои срцата на милиони луѓе ширум светот, почина на 88-годишна возраст по долга борба со рак на панкреасот.
Веста за неговата смрт беше соопштена на неговиот официјален Инстаграм-профил, каде што беше истакнато дека „сочувството, скромноста и вербата во добрината на луѓето“ остануваат како негово најголемо наследство.
„Ќе биде запаметен не само како почитуван судија, туку и како посветен сопруг, татко, дедо, прадедо и пријател. Неговата топлина и хумор оставија неизбришлив белег кај сите што имаа среќа да го запознаат“, се наведува во пораката.
View this post on Instagram
Објавата беше проследена со фотографии од неговата судиска кариера, но и од приватниот живот со семејството.
Само еден ден пред да биде објавена тажната вест, Каприо се обрати до јавноста со емотивно видео од болничкиот кревет. Во пораката тој откри дека повторно е хоспитализиран и упати молба до своите следбеници: „Семоќниот нè чува, затоа сетете се на мене, ве молам“.
Судија кој стана светска ѕвезда
Каприо стана познат преку реалното шоу „Caught in Providence“, во кое неговиот необичен пристап кон казнените постапки – со сочувство и разбирање за животните тешкотии на луѓето – го претворија во глобален феномен.
Емисијата, која се емитуваше од 2018 до 2020 година, освои четири номинации за дневна награда Еми, а Каприо беше номиниран и за најдобар ТВ-водител.
На социјалните мрежи, неговите видеа станаа вирални и се споделуваа милиони пати. Во еден од најпознатите случаи, тој го ослободи 96-годишен возач обвинет за пребрзо возење, откако дозна дека мажот го возел својот син болен од рак на лекар.
Последната борба
Во декември 2023 година, Каприо јавно објави дека му е дијагностициран рак на панкреас.
„Извештајот не беше добар“, призна тогаш, додавајќи дека е под надзор на медицински тимови во Род Ајленд и во престижниот Институт за рак „Дана-Фарбер“ во Бостон.
„Се молам Бог да ги насочува нивните умови и раце додека ме лекуваат“, рече Каприо во своето обраќање.
Иако ја изгуби битката со болеста, неговото наследство останува запишано во милиони срца.
„Во негова чест, внесете малку повеќе сочувство во светот – исто како што тој правеше секој ден“, се вели во последната порака на неговото семејство.
View this post on Instagram
